Напярэдадні Дня Перамогі БРСМ запусціў у сацыяльных сетках рэспубліканскі чэлендж #Беларусьпомніць. Удзельнікам прапанавалі размясціць здымак з сямейнага архіва з родзічамі-франтавікамі і перадаць эстафету свайму сябру альбо знаёмаму. Далучыцца да чэленджа мог любы жадаючы.

Фотаздымкамі герояў вайны дзяліліся і астраўчане. На старонках газеты мы раскажам пра ветэранаў, якія сталі ў анлайн-строй.

Успамінамі аб прадзедзе падзялілася першы сакратар Астравецкага РК ГА БРСМ Віялета Алексеявец.

– Прадзед нарадзіўся ў 1924 годзе ў Беразоўцы на Астравеччыне, – расказвае праўнучка ветэрана. – Служыць пайшоў у Войска Польскае, дома засталася жонка, мая бабуля Станіслава Іванаўна. Дзяцей у іх не было, адзіны сын нарадзіўся пасля вайны – у 1949-м.

Баляслаў Ягоравіч быў  прызваны Астравецкім райваенкаматам Маладзечанскай вобласці ў лістападзе 1944 года ў 1-ю пагранбрыгаду 35-га пяхотнага палка, дзе служыў стралком. А дэмабілізаваўся з Войска Польскага толькі ў канцы лютага 1947 года.

– Я захоўваю дзядулевы даку­менты, сярод іх ёсць і пасвед­чанні аб узнагароджанні ордэнам Айчыннай вайны  ІІ ступені, медалямі «За Одру, Нісу і Балтыку», «Знак Грунвальда», «За Перамогу над Германіяй у Вялікай Айчыннай вайне 1941 – 1945 гг.», юбілейнымі медалямі. Для мяне прадзядуля сапраўдны герой! – з гонарам гаворыць праўнучка ветэрана.

У суполцы Астравецкага РК ГА БРСМ створаны фотаальбом «Памяць нашчадкаў». Калі вы хочаце расказаць пра свайго родзіча-франтавіка, тэлефануйце па нумары 8(01591) 7-98-43 альбо пішыце на электронны адрас ostrovets.brsm@mail.ru і дзяліцеся ўспамінамі пра вашага героя. Няхай імёны абаронцаў Радзімы застануцца ў памяці нашчадкаў.